លោក ងិន សុខគ្រវ៉ារ ជានិពន្ធបទភ្លេង និងទំនុកច្រៀងបទ “ស្អាតជានិច្ច” បច្ចុប្បន្នមានឋានៈជាទីប្រឹក្សាក្រសួងព័ត៌មានបានលើកឡើងថា អ្នកនាង ពេជ្រ សោភា ប្រហែលជាគិតថា ម្ចាស់បទដើមបានស្លាប់បាត់ទៅហើយ បានជាហ៊ានយកបទរបស់លោកមកកែច្នៃដោយមិនមានការអនុញ្ញាតបែបនេះ។ លោកចាត់ទុកថា ការយកបទរបស់លោកមកកែច្នៃនេះ បានឲ្យប៉ះពាល់ក្មេងៗខ្លាំង ផ្ទុយពីខ្លឹមសារដើម និង រំលោភសិទ្ធិកម្មសិទ្ធិបញ្ញារបស់លោក។
យ៉ាងណា អ្នកនិពន្ធរូបនេះ មិនមានគម្រោងប្ដឹងទៅខាងផលិតកម្មរស្មីហង្សមាសទេ ប៉ុន្តែថា លោកមានគម្រោងទៅជួបខាងផលិតកម្មផ្ទាល់ ដើម្បីជជែកលើបញ្ហានេះ ថាតើគួរមានសំណង ឬយ៉ាងណា ។ បើមិនមានដំណោះស្រាយ ណាមួយសមហេតុសមផលទេ លោកនឹងរកអ្នកជំនាញខាងផ្លូវច្បាប់ជួយលោកលើកិច្ចការនេះ។
ងាកមកខាងផលិតកម្មរស្មីហង្សមាសវិញ នៅព្រឹកនេះ អ្នកនាងពេជ្រ សោភា ជាតារាចម្រៀង ក៏ដូច លោក អ៊ិន ទីតូ អ្នកគ្រប់គ្រងកម្មវិធីសិល្បៈនៃស្ថានីយទូរទស្សន៍ហង្សមាស មិនអាចទាក់ទងបានទេ ដោយទូសព្ទអ្នកទាំង២ ខលចូលមិនមានអ្នកទទួល។
តាមការលើកឡើងរបស់ លោក ងិន សុខគ្រវ៉ារ បទ ”ស្អាតជានិច្ច” លោកបាននិពន្ធឡើងក្នុងអំឡុងខែ មិថុនា ឆ្នាំ ១៩៨២ ដែលចម្រៀងមួយនេះ ច្រៀងដោយក្រុមកុមារ នៃមជ្ឈមណ្ឌលកូលាបទី១ប្រគំភ្លេងដោយក្រុមតន្ត្រីវិទ្យុជាតិ។ បទមួយនេះ លោក និពន្ធ ឡើងក្នុងន័យមួយ ដើម្បីឲ្យកុមារចេះធ្វើអនាម័យខ្លួនប្រាណ ក្នុងការរស់នៅរាល់ថ្ងៃ។
លោក ងិន សុខគ្រវ៉ារ បានប្រឡូកក្នុងអាជីពជាអ្នកនិពន្ធ តាំងពីបែករបបខ្មែរក្រហម លោកមានវ័យ៦៦ឆ្នាំ ។ ក្នុងអាជីពជា អ្នកនិពន្ធបទចម្រៀងកុមារ ទីប្រឹក្សាក្រសួងព័ត៌មានរូបនេះ ធ្លាប់និពន្ធបានជាង១០០បទមកហើយ ដោយបទទាំងនោះ មិនទាន់មានបទណាមួយ ត្រូវបានអ្នកនិពន្ធរូបនេះ យកទៅចុះបញ្ជីកម្មសិទ្ធិបញ្ញានៅឡើយទេ។ បច្ចុប្បន្នលោក គឺជាគ្រូបង្រៀនភ្លេងមួយរូប នៅផ្ទះរបស់លោកខាងត្បូងវិទ្យាល័យជ្រោយចង្វា៕
0 comments:
Post a Comment